Ku Saabsan Khilaafka Saylac & Borama
Hordhac
Anagoo ka duulayna masuuliyadda naga saaran ilaalinta nabadda, wada noolaanshaha iyo midnimada bulshada Somaliyeed, waxaan halkaan ku soo bandhigaynaa baaq qaran oo ku salaysan xaqiiqo, caddaalad iyo xeer.
Khilaafka ka curtay joojintii xaflad dhaqan oo sharci ahaan loo oggolaaday in lagu qabto magaalada Saylac, iyo rabshadihii ka dhacay Borama, wuxuu muujiyay nuglaanshaha nidaamkeena dhexdhexaadinta iyo baahida loo qabo xal waara.
1. Caddayn Ku Saabsan Hadalkii Ugaaska Ciise
Waxaan si cad u qeexaynaa in hadalkii Ugaaska beesha Ciise ee ahaa:
“Ciisow dhulkiina difaaca”
uusan ahayn baaq dagaal ama weerar ka dhan ah beesha Gadabuursi,
balse uu ahaa hadal siyaasadeed oo loola jeeday dawladdii joojisay xaflad hore u oggolaansho buuxda u siisay.
Haddii hadalkaas si kale loo fasirtay, waa in maanta si cilmi iyo xigmad leh loo saxo si loo joojiyo fahamka khaldan.
2. Maqaamka Magaalada Saylac
Saylac waa magaalo qaran oo ka tirsan nidaamka ka dhisan Somaliland.
Taariikh ahaan waa deegaan ay ku abtirsadaan beelaha Ciise,
balse waa magaalo ay ku wada noolaan karaan dhammaan muwaadiniinta somalieed ee ku nool Somaliland,
iyagoo ixtiraamaya xeerarka, dhaqanka iyo wada noolaanshaha beesha degaanka.
Qofna xaq uma laha in uu:
- u adeegsado sheegasho deegaan si uu u diido munaasabad sharci ah,
- ama u kiciyo colaad iyo kala fogaansho bulsho.
3. Codsi Raalli-gelin oo Ku Wajahan Beesha Gadabuursi
Waxaan beesha Gadabuursi ka codsanaynaa inay si walaaltinimo ah
raalli-gelin uga bixiso sheegashadii Saylac, hadaladii xanafta lahaa, cayda iyo erayadii dhiigga bannaynayay
ee laga jeediyay beesha Ciise, maadaama hadalkaasi dhaawacayo wada noolaanshaha bulshada.
4. Codsi Raalli-gelin oo Ku Wajahan Dawladda Somaliland
Waxaan Dawladda Somaliland ka codsanaynaa inay:
- si rasmi ah raalli-gelin uga bixiso joojintii xafladdii sharci ahaan loo oggolaaday ee Saylac,
- gaar ahaan inay raalli-gelin u jeediso Ugaaska beesha Ciise,
- kuna celiso kalsoonida shacabka iyadoo muujinaysa go’aan cad oo mabda’ leh.
5. Talooyin Xal Waara
Si looga hortago in arrimahan ay mar kale dhacaan, waxaan soo jeedinaynaa:
- In la dhiso guddi dhexdhexaadin qaran oo madax bannaan.
- In si cad loo qeexo habraaca munaasabadaha dhaqameed ee magaalooyinka waaweyn.
- In la joojiyo hubaysiga qabiilka lana xoojiyo doorka hay’adaha amniga.
Gunaanad
Nabadda waa geesinimo, dagaalkuna waa guuldarro.
Ciise, Gadabuursi iyo dhammaan beelaha somaliyeed ee dagga Somaliland waxay mudan yihiin mustaqbal ka wanaagsan kan colaadda.
Baaqani waa mid ku dhisan xaq, xigmad iyo wada noolaansho.
Waan ku baaqaynaa in la qaato maanta, ka hor inta uusan berri noqon mid aan la sixi karin.
About the Author
