Warbixin:
Shirkii Golaha Guud ee Qaramada Midoobay ayaa ka dhacay New York, halkaas oo mowduuca ugu weyn uu ahaa dagaalka ka socda Gaza. Madaxweynaha Maraykanka Donald Trump ayaa khudbad uu halkaas ka jeediyay ku baaqay in “dagaalka hadda la joojiyo,” isagoo dalbaday xabbad joojin degdeg ah iyo sii deynta maxaabiista. Hadalkan wuxuu yimid xilli xaaladda bani’aadamnimada ee Gaza ay noqotay mid aad u xun, kumannaan qofna la laayay. Dhanka kale, warbixinnada Qaramada Midoobay ayaa si toos ah ugu eedeeyay Israa’iil xasuuq iyo ku tumasho xuquuqda dadka Falastiiniyiinta ah. Taasi waxay sababtay in Israa’iil gasho go’doon caalami ah, halka dalal badan ay si rasmi ah u aqoonsadeen Dawladda Falastiin
Falanqayn:
Hadalka Trump wuxuu u muuqdaa mid laba wajiile ah. Dhanka hore, wuxuu isku dayayaa inuu isu muujiyo hoggaamiye doonaya nabad iyo xabbad joojin. Dhanka kale, wuxuu ka dhaxlay sumcad hore oo ku dhisan taageeradii uu Israa’iil siiyay hub iyo dhaqaale, taas oo dadka badan ku dhalisay shaki ah inuu yahay munaafaq siyaasadeed oo sumcad raadis ah. Israa’iil-na waxay maanta la kulantay go’doon siyaasadeed oo aan horey loo arag: madax badan oo caalami ah ayaa ka fogaanaya wada shaqayn toos ah, dalal badan oo Yurub iyo Latin America ahna waxay u aqoonsadeen Falastiin dawlad madax-bannaan. Ra’iisul Wasaaraha Israa’iil, Benjamin Netanyahu, wuxuu lumiyay kalsooni caalami ah kadib hadallo iyo ficillo gardarro ah oo ka dhan ah shacabka Falastiin, waxaana shirarka caalamiga ah laga dareemay in la iska ilaaliyo xiriir muuqda oo lala yeesho.
Gunaanad:
Dunida intiisa badan waxay maanta isku raacday in dagaalka Gaza la joojiyo, taas oo calaamad u ah in Israa’iil lumisay taageeradii caalamka. Falastiin, dhanka kale, waxay kasbatay taageero iyo sharciyad siyaasadeed oo sii xoogeyneysa. Balse haddii Maraykanka dhab ka yahay nabadda, waxaa la sugayaa ficil cad oo uu ku joojinayo taageerada hubka Israa’iil, halkii uu hadal kaliya ka jeedin lahaa.
About the Author
